Føroyingarnir gjørdu vart við seg í evropahondbólti

Valur vann stórsigur í føroyingauppgerðina ímóti Mors-Thy í European League í gjár.

Bjarni í Selvindi og Allan Norðberg fóru av vøllinum við 39-28 sigri ímóti Magnusi Árasyni í fyrsta dystinum í bólki H í næststerkastu kappingini hjá EHF.

Allir tríggir skutu mál. Bjarni í Selvindi skeyt seks mál upp á átta skotroyndir, meðan Allan Norðberg fekk fýra upp á fýra. Ungi Magnus Árason, sum er nýggjur í Mors-Thy, skoraði tvær ferðir upp á seks skot.

Teis Horn Rasmussen og Holstebro spældu eisini í European League og løgdu frá landi við 33-23 útisigri ímóti kekkiska liðnum Karvina.

Føroyski strikuspælarin skoraði trý mál og misnýtti einaferð fyri nýggja danska felagið hjá sær.