Fótbóltur kann tálma lívsstílssjúkum

Fótbóltur - og aðrar ítróttargreinar - kunnu nýtast til at viðgera lívstílssjúkur sum diabetes og hjarta- og æðrasjúku.

Tað sigur gransking, sum var løgd fram á altjóða ráðstevnuni, Football is Medicine 2020, sum varð í Kongshøll um vikuskiftið.

 - Fótbóltur virkar sum breiðspektraður heilivágur. Tað vil siga, at tað ber til at brúka fótbólt og onnur bóltspøl, sum part av viðgerðini av teimum stóru lívsstílssjúkunum, sigur Magni Mohr, professari á Fróðskaparsetri Føroya.

Magni Mohr sigur, at tað er sannlíkt, at læknin í framtíðini fer at senda sjúklingar til heilsufótbólt sum part av sjúkraviðgerð.

 - Tað kundi verið tað, ella svimjing, venjingarmiðstøð, rógving ella at ganga í fjøllunum. Men tað krevur, at mann setir eina skipan upp, at tað er undir umsjón og at hetta er nakað, sum heilsuverkið er við upp á, sigur Magni Mohr.