Veðrið órógvar aftur altjóða fótbólt í Føroyum

Øll flogferðsla restina av degnum er avlýst vegna veður. Millum flogførini, sum eftir ætlan skuldu koma til Føroya, var eitt Scat Air-flogfar úr Astana við kasakstanska manslandsliðnum í fótbólti. 

KVF hevur tosað við Regin I. Jacobsen, stjóra í Vága Floghavn. Hann vísir til kunningina á heimasíðuni hjá flogvøllinum. Har tað sæst, at Atlantic Airways hevur lagt tvey flogfør til at lenda tíðliga í morgin. Hetta kundi so verið møguleikin hjá Scat Air-flogfarinum at lent.

Hetta er ikki fyrstu ferð í ár, at veðrið í Vágum órógvar ein altjóða dyst. Í summar hevði Lech Poznań trupulleikar við at koma til Føroya undan dystinum móti KÍ. Pólska liðið valdi at koma seint við leiguflogfari. Dysturin varð at enda fluttur eitt samdøgur, men skráin til Nations League loyvir ikki eini útsentan.

Veðrið hevur eisini ávirkað fyrireikingarnar hjá føroyska manslandsliðnum. Venjingin, sum upprunaliga skuldi vera klokkan 13 í dag, er flutt til klokkan 16 vegna veður.

Føroyar og Kasakstan spæla á Tórsvølli leygardagin klokkan 17. Dysturin er fyrsti dysturin hjá Føroyum í nýggju UEFA Nations League-kappingini, har Føroyar eisini eru í bólki við Moldova og Slovakia. Sjónvarpið vísur dystin og byrjar at senda klokkan 16.