Taka undir við nýggjum kappingarleisti

Í kvøld spælir føroyska fótbóltslandsliðið við kvinnum sín síðsta dyst í hesari HM-undankappingini.

Mótstøðuliðið er Skotland, sum liggur á 2. plássi í bólkinum, og hevur tørv á trimum stigum fyri at tryggja sær pláss í endaspælinum.

 - Vit taka tað við stívum armi, og gera okkara allarbesta, sigur liðskiparin, Ásla Johannesen, sum hevur verið darvað av skaða í tríggjar mánaðir. 

AGF-spælarin var tó á vøllinum í fyrra hálvleiki í 3-0 tapinum ímóti Ukreina fríggjakvøldið og slapp snikkaleys frá dystinum.

 - Tær eru jú heimsklassi, sigur hon.

Ja, takk til nýggjan kappingarleist

Og Skotland er ikki einasta sterka liðið, sum Føroyar hava møtt í hesi undankappingini. Ungarn, Ukreina og ikki minst krútsterka spanska landsliðið hava givið unga føroyska liðnum ein veruligan elddóp.

Tí halda bæði Ásla Johannesen og danski venjarin, Lene Terp, at ein nýggjur kappingarleistur hevði verið gagnligur fyri menningina hjá føroyska landsliðnum.

Sum skilst er evropeiska fótbóltssamgongan, UEFA, á veg nýggjum leisti, sum kanska minnir eitt sindur um Nations League, har lið verða bólkaði saman við londum á nøkulunda sama stigi.

 - Har skulu vit spæla ímóti liðum, sum eru á okkara stigi og hava somu fyritreytir fyri at vera góð, tí tað snýr seg eisini í stóran mun um, hvørjar fyritreytir tú hevur, sigur Lene Terp.

 - Tað er eingin loyna, at tað er stuttligt at spæla ímóti heimselituni og tínum fyrimyndum, men tað er betri fyri øll lið, at spæla ímóti onkrum á sama stigi. Tað hevði verið gott fyri okkum, um vit sloppu at spælt dystir, sum telja, ímóti liðum nærri okkara stigi, sigur Ásla Johannesen.

lene_terp_mynd.jpg

Frítekst tagging: 

Ítróttur

Fótbóltur

Føroyar

Lene Terp