Nýggj lóg um pant send til hoyringar

Tíðin, tá fólk skulu ganga úr handli til handil fyri at sleppa av við fløskur og onnur endurnýtsluíløt, er skjótt farin. Tí nú er ein nýggj lóg send til hoyringar.

Høvuðsendamálið við uppskotinum er at gera tað møguligt at sleppa av við øll síni pantáløgdu íløt á sama stað.

Soleiðis stendur í uppskotinum til løgtingslóg um pant á íløtum og uppskot til kunngerð um pant á íløtum til drykkjuvørur og matvørur, sum Magnus Rasmussen, landsstýrismaður í umhvørvis- og vinnumálum, hevur sent til hoyringar.

Men ikki øll eru líka glað fyri uppskotið í verandi líki. 

Ein teirra er Bergur Robert Dam Jensen, ið rekur handil í Kollafirði. Hann heldur, at tað er ov tungt, serliga hjá smáu handlunum, at skilja sundur øll sløg av pantálagdum íløtum.

Fevnir ikki um Rúsuna

Lógin fer ikki at umfata Rúsdrekkasøluna.

Hon hevur góða skipan, har 90 prosent av íløtunum koma aftur, sigur Umhvørvis- og Vinnumálaráðið.

Lógaruppskotið sigur, at tað liggur á innflytara og framleiðara at syrgja fyri, at íløt koma til endurnýtslu og endurvinning.

Men lógin ásetur ikki, hvussu hetta skal gerast.

Tað stendur tí innflytarum, framleiðarum, sølustøðum og góðkendum móttøkum frítt at samstarva og skipa seg í sambandi við innheintingina.

Endamálið við nýggju lógini er ikki at lata tað almenna ella eitt alment partafelag taka ímóti meginpartinum av pantáløgdu íløtunum, sigur Umhvørvis- og Vinnumálaráðið