Elon Musk sett avmarkingar á Starlink-tænastu í Ukraina

Amerikanska rúmdarfelagið hjá Elon Musk, SpaceX, hevur - sambært ukrainskum myndugleikum - sett nýggjar avmarkingar á hernaðarligu Starlink-tænastuna í Ukraina.

Tað skrivar Reuters.

Avmarkingin merkir, at fylgisveinasambandið dettur burtur, tá lutir ferðast meira enn 160 kilometrar um tíman.

Sambært einum ráðgeva hjá ukrainska forsetanum, fekk herurin onga ávaring frammanundan tveimum russiskum álopum á Ukraina seinastu dagarnar, og broytingin hevur longu órógvað fleiri hernaðarligar uppgávur við dronum.

Sambandið burtur í fleiri sekund

Ukrainskar hernaðarkeldur siga, at sambandið í summum førum hevur verið burtur í 10 til 20 sekund.

Enn hevur SpaceX ikki alment greitt frá orsøkini til avmarkingina.

Broytingin kemur samstundis sum USA leggur trýst á Ukraina, fyri at fáa landið at gevast við álopum á russisk oljureinsiverk.