Oyggjaleikir: Formaðurin og systkini umboða Føroyar í borðtennis

Fróði Fríðason Jensen skal spæla borðtennis fyri Føroyar á oyggjaleikunum í Guernsey í summar.

Tað skal Ári Fríðason Jensen eisini. Umframt brøðurnar Fróða og Ára er systirin, Durita Fríðadóttir Jensen, eisini á landsliðnum, sum skal til kanaloynna í summar. 

 - Nú havi eg roynt at havt yngri systkin við fyrr, systir mín kemur við eisini, og nú er lítlibeiggi mín eisini við, so trioin fullkomin, sigur Fróði Fríðason Jensen, sum eisini er formaður í Borðtennissambandinum. 

 - Tað kennist øgiliga væl. Eisini at fara við saman við systkunum hjá mær, tað verður stuttligt, sigur Ári Fríðason Jensen, sum er við fyri fyrstu ferð.


Fyrireikingarnar til leikirnar ganga væl

Tað hevur verið leingi at bíða eftir leikunum á Guernsey, sum nú nærkast av álvara.

Fýra ár eru síðan síðstu leikirnar á Gibraltar, tí koronufarsóttin hevði við sær, at tað ikki bar til at kappast í 2021.

 - Eftir at leikirnir vórðu útsettir í 2021, kom ein steðgur í fyrireikingarnar, men tær vórðu tiknar uppaftur í fjør, og nú bert nakrir fáir mánaðir eru til leikirnar, ert tú komin hartil, at tað mesta er klárt, sigur Andras Nolsøe, ítróttarráðgevi hjá Ítróttasambandinum.

Borðtennishópurin er tikin út, og aðrar ítróttagreinar eru í holt við at velja sínar íðkarar, sigur Andras Nolsøe. Freistin er 30. apríl.