Aftur í Stjørnuni: Kári Horn vil venda gongdini

Fyri tveimum vikum síðan, gjørdist Kári Horn aftur venjari í Stjørnuni.

Bert eitt ár er ligið, síðan hann takkaði fyri seg, men afturkomni venjarin hevur greiðar ætlanir um at venda vánaligu gongdini í klaksvíksfelagnum. 

 - Tað er kalt, smílist Kári Horn, tá hann verður spurdur um, hvussu tað er at vera aftur í Klaksvík. Óvist er, um hann sipar til veðurlagið ella fáu stigini í stigatalvuni higartil, men stigatlavuna ætlar hann í øllum førum at gera okkurt við.

 - Vit hava arbeitt fram ímóti, at hini helst ikki skulu gera av nógv mál í mun til seinast, og tað gekk framá hesa ferð, sigur afturkomni venjarin.

Um vikuskiftið eydnaðist at vinna sannførandi á VB, og nú hyggja klaksvíkingarnir uppeftir.

 - Vit skulu taka nøkur smá fet í senn, men vit mugu longur upp. Tað er ætlanin, sigur Kári Horn.

Hvussu langt?

 - Helst allan vegin, men nú mugu vit síggja, hvørjar spælarar vit hava at arbeiða við.