Manchester United stjørna: - Teir vóru djarvir

Manchester United-stjørnan Rasmus Højlund rósti avrikinum hjá føroyska landsliðnum eftir at Danmark hevði vunnið 2-0 á Brøndby Stadion týskvøldið.

 - Teir royndu at spæla seg fram eftir vøllinum. Tað vórðu teir sjálvandi eisini revsaðir fyri tíðliga í dystinum, segði Rasmus Højlund.

Hann sipar til fyrra málið hjá dønum í 8. minutti, tá Gunnar Vatnhamar misti ein bólt stutt frá føroyska málinum, og Pierre-Emile Højbjerg fekk ein ókeypis kjans at leggja Danmark á odda.

Ungi framherjin varð spurdur, um tað er skilagott hjá Danmark at spæla venjingardyst ímóti Føroyum stutt undan EM-endaspælinum í summar, har danir fara at fáa munandi meir mótstøðu, men tað vildi hann ikki svara upp á.

Hann lat sum heild væl at fyrireikingunum hjá Danmark, sum annars hevur fingið nógvar ákoyringar fyri laku avrikini seinastu árini.