Ungir spælarar undir stórum trýsti

 - Hetta er gandakent, segði landsliðsvenjarin hjá føroyska hondbóltslandsliðnum, Claus Mogensen.

Sum tann fyrsti hevur hann ført føroysku hondbóltskvinnurnar til eitt endaspæl, og júst EM-plássið var hann sera fegin um.

Hann var kortini ikki nøgdur við avrikið í 24-20 tapinum fyri Íslandi.

 - Vit spæla onki serliga gott í dag. Vit mugu eisini ásanna, at talan var um ungar spælarar undir stórum trýsti, segði landsliðsvenjarin, sum nevndi nógvu misnýttu kjansirnar.

Avrikið ímóti Svøríki bjargaði Føroyum

Hóast Føroyar taptu við fýra málum, endaði hondbóltslandsliðið kortini 10 mál frammanfyri Grikkaland, og fekk uttasta EM-mandatið. 

 - Vit verða bjargaðar av, at vit spæla ein framúr góðan dyst ímóti Svøríki, og tað gjørdi, at vit kundu liva við tapinum í dag, segði Claus Mogensen.

Føroyar skulu venja seg við at spæla dystir, har nógv stendur upp á spæl.

 - Tað krevur, at vit byggja upp royndir, og tað hava ungu spælararnir ikki enn, staðfesti landsliðsvenjarin.