Fegnaðist um málið og sigurin

Ein góður tími var spældur, tá Petra Hoydal var send á vøllin til sín fyrsta A-landsdyst fyri Føroyar.

Framherjin, sum fyrr hevur spælt fimm ferðir fyri føroyska U19-landsliðið, býr í Danmark, men mamman er føroysk, og nú fekk 19 ára gamla Petra Hoydal kjansin frá Signe Pries Andersen.

Og hon gjørdi skjótt av. Tá 11 minuttir vóru eftir at spæla, fekk hon fótin á eitt innlegg frá Jensu Tórálvsdóttir, og bólturin smeyg sær innum mállinjuna til 4-0, sum eisini gjørdist úrslitið av dystinum.

 - Hetta var ein stór uppliving. Eg eri sera fegin um at fáa mín fyrsta landsdyst, og at tað eydnaðist at vinna, segði Petra Hoydal.

 - Tað var vilt (at fáa mítt fyrsta mál, red.). Tað var tað, eg hevði vónað, og eg eri errin av tí.

Sunniva Willemoes Dal Christiansen, Ásla Johannesen og Birita Ryan skutu hini málini í føroyska stórsigrinum. Tey komu øll eftir deyðbóltar.

Týsdagin vitjar Grikkaland á Tórvølli í fjórða dystinum í hesi EM-undankappingini.