Dagsins leikari: Verjan er avgerðandi

Um Rakul Wardum fór við yvirskriftunum ímóti Sveis, fekk Annika Fríðheim Petersen væl og virðiliga uppiborið rós fyri framúr avrikið í søguliga EM-javnleikinum ímóti Kroatia.

Málverjin tók 17 av 31 skotum - eitt bjargingarprosent upp á heili 54.84 - og átti ivaleyst størsta heiðurin fyri fyrsta stigið hjá føroysku kvinnunum í einum endaspælið. 

 - Vit vildu spæla á EM-stigi, og tað haldi eg heilt sikkurt, at vit gjørdu í dag, segði høvuðspersónurin sjálvur eftir dystin.

Hvat er tað, sum riggar so væl?

 - Hundrað prosent verjan. Vit halda okkum til tær avtalurnar, og eg fái skotini, har eg vil. Og so var tað viljin. Vit berjast fyri hvørji aðrari, og eingin kroatur sleppur lætt ígjøgnum, sjálvt um tær eru sterkari enn vit. Tað er stuttligt, tá ein kroatur liggur niðri, og tríggir føroyingar standa uppiyvir henni, segði Annika Fríðheim Petersen.