Landsliðið væntar sær truplan útidyst

Føroyar vunnu við 11 málum í einari fullsettari ítróttahøll á Hálsi seinast landsliðini møttust.

Tað var í november í fjør og var fyrsti dystur í hesari EM-undankappingini.

Nógv vatn er runnið í ánna, síðan tá. Føroyar eru oddalið í bólkinum við 5 stigum og Kosovo liggur aftast við 3 stigum.

Kosovo hevur fingið øll síni stig á heimavølli. Balkanlandið spældi javnleik móti Hollandi í november og vann móti Ukraina í mars.

Føroysku spælararnir og venjarin vænta sær tí truplan dyst í háborgini í høvuðsstaðnum í Kosovo.

Tað skal vilja illa til hjá føroyska landsliðnum, sleppur liðið ikki við til EM-endaspælið í januar 2025.

Javnleikur móti Kosovo er nóg mikið, so er enn eitt EM-endaspæl veruleiki.