Ítróttarfagnaðurin beinleiðis í sjónvarpinum klokkan 20

Ítróttasamband Føroya skipar á hvørjum ári fyri tiltakinum ”ÍtróttaFAGNAÐURIN”, ið hevur til endamáls at heiðra føroysk ítróttafólk, hjálparfólk, leiðarar, venjarar, eldsálir o.o., sum virka í føroyska ítróttaheiminum.

Ítróttarfagnaðurin verður eisini sendur beinleiðis í sjónvarpinum, og sendingini byrjar klokkan 20. 

Umframt at heiðra eina rúgva av ítróttarfólkum, so vera eisini fleiri spennandi tónleikaframførslur við Beinir, Swardi, Dávur, og Sophiliu, ið er ein av spírunum í nýggju Kringvarps-tónleikarøðini "Hoydalar": 

Vertir eru Eydna Skaale og Jógvan Skeel Nolsøe. 

Heiðurslønirnar

Á Ítróttarfagnaðinum skulu finnast ítróttafólk ella úrvalsíðkarar til heiðurslønirnar ÍtróttaNAVNIÐ og ÍtróttaSTJØRNUSKOTIÐ.

Stóra arbeiðið, sum fer fram í ítróttafeløgunum og sambondunum, skal eisini virðismetast, og heiðurslønin ÍtróttaFELAGSSKAPURIN verður latin til ein virknan felagsskap, sum ger eitt gott ítróttaligt og samfelagsligt arbeiði.

Ársins ÍtróttaVENJARI er ein persónur, sum skapar eitt ítróttaumhvørvið, ið rúmar bæði breidd og úrval, har øll trívast saman, og har íðkararnar vilja gera sítt besta til venjing og til dystir/kappingar 

Heiðurslønin ÍtróttaEldsálin er ein sjálvboðin venjari, liðleiðari, stevnuábyrgdari, nevndarlimur, samskipari ella onkur annar, ið við serligum innsatsi hevur viðvirkað til samanhaldið í sínum ítróttafelag seinasta árið.

ÍtróttaSÓLSTRÁLAN er ein ungur persónur – 20 ár ella yngri – ið við sínum góða lið- og felagsanda ger sítt íkast til, at hini á liðnum ella í felagnum føla seg vælkomnan, sæddan og sum ein umráðandi part av liðnum/felagnum.

Eisini skal ein heilt serlig ÍtróttaLØTA veljast og hana sleppur almeningurin at velja. Atkvøðast kann á SONA appini áðrenn og meðan tiltakið er.

Heiðursskjal Poul E. Petersen verður latið eini eldsál, sum í eitt mannaminni hevur tænt ítróttinum á serstakan hátt.

Ítróttarfagnaðurin 2025

Hvat: Ítróttarfagnaðurin 2025
Hvar: Í Varpinum í Klaksvík, í sjónvarpinum, og á KVF Sjón
Nær: Í kvøld, leygarkvøldið, kl. 20, ella tá tað passar tær á KVF Sjón