Sissal Jóhanna er rørd av øllum kærleikanum og stuðlinum úr Føroyum

Hóast Sissal Jóhanna Norðberg Niclasen ikki sleppur at hava Merkið við sær til seinnu Eurovision-hálvfinaluna í kvøld, so hevur hon Føroyar og føroyingar við sær í hjartanum

Ida Marie Odgaard/Ritzau Scanpix

Sissal Jóhanna Norðberg Niclasen vónar, at føroyingar kunnu vera ernir av sær

Uni L. Hansen

Rúni Jákupsson

15.05.2025 - 13:34

"Hey føroyingar! Eg eri vil bara siga túsund takk fyri alla stuðulin, og eg eri ræðuliga errin av at vera føroyingar, og ordiliga rørd av, hvussu øll standa saman um hetta her."

Soleiðis sigur Sissal Jóhanna Norðberg Niclasen í einari heilsan til allar føroyingar, nú niðurteljingin til hennara Eurovision-luttøku av álvara er byrjað.

Beint nú vænta veddingarfyritøkurnar ikki, at Sissal Jóhanna og "Hallucination" megna at vinna Danmark fyrsta finaluplássið síðani 2019.

Sissal Jóhanna Norðberg Niclasen, Eurovision 2025

Mynd: Ritzau / Scanpix

Í løtuni liggja Sissal Jóhanna og "Hallucination" á einum 14. plássi hjá veddingarfyritøkunum, og tað er eitt fitt fet upp til 10. plássið, ið gevur atgongd til finaluna.

Men týskvøldið tóku veddingarfyritøkurnar so dyggiliga feil, tá bæði Ísland og Norra, ið tað ikki varð vænta fór at røkka finaluna, sungu seg í finaluna.

Kringvarp Føroya sendir Eurovision-hálvfinaluna í kvøld og finaluna leygarkvøldið, og tað verður eingin annar enn okkara egni Gunnar Nolsøe, ið er frásøgufólk.

Gleði tykkum til eina sera, sera, sera leskiliga og spennandi sending.