U21-hondbóltur: Føroyar og Slovenia brúka somu uppskrift

Gjøgnumbrot, innspøl og bóltar út á veingin.

Tað verður uppskriftin hjá bæði Føroyum og Slovenia, tá U21-landsliðini í hondbólti bresta saman í HM-fjórðingsfinalu í kvøld.

 - Føroyar og Slovenia eru klárt tey bæði liðini í kappingini, sum hava skotið minst langskot, sigur annar av venjarunum, Hjalti Mohr Jacobsen.

 - Teir vilja hava bóltarnar inn á strikuna, út á vengurnar og annars gjøgnumbrot. So tað er eitt lið, sum spælir nokkso líka sum vit, sjálvt um teir spæla meir seks ímóti seks, har vit spæla sjey ímóti seks.

Yvirtalsspæl og tolin verja

Júst yvirtalsspælið við tómum máli og tveimum strikum verður nógv at síggja hjá føroyingunum í Sosnowiec, meðan verjan fer at standa aftarliga og bíða eftir slovensku gjøgnumbrotsroyndunum.

 - Teir vilja helst sleppa undan at skjóta útifrá - teir eru ikki serliga stórir, teir eru snildir - so vit fara at royna at dekka upp fyri gjøgnumbrotunum og innspølum til strikuna. So í verjuni fara vit at bíða eitt sindur eftir teimum, sigur Hjalti Mohr Jacobsen.

Venjarin heldur, at føroysku U21-menninir hava royndirnar, sum eru neyðugar, skalt tú spæla teg til eina HM-hálvfinalu.

 - Vit hava verið í líknandi støðum fyrr. Um tað eitur kvartfinala ella millumrundudystir ella hvat tað eitur tey síðstu fýra árini, so hava vit ótrúliga ofta spælt dystir, har vit høvdu verið útslidnir, um vit tapa, sigur Hjalti Mohr Jacobsen.

(Mynd: IHF/Kolektiff/Sasa Pahic Szabo)