- Hon var ræðuliga glað fyri at vinna á mær

Anja Eydnudóttir vann fimm gullheiðursmerki í Gotlandi fyri átta árum síðan, og ein av teimum, sum mátti lúta ta ferðina, var Zoe Gray úr Guernsey. 

Hesa fer var akkurát øvugt. Zoe Gray vann tryggan 137-132 sigur á føroyska skjúttanum, sum ikki skeyt upp til sítt besta.

 - Faktiskt fín kensla kortini. Stuttligt at skjóta ímóti júst henni, tí tað var heni eg skeyt ímóti í Gotlandi í '17 eisini, so hon var ræðuliga glað fyri at vinna á mær í dag, segði Anja Eydnudóttir.

Hillin á boganum hjá Anju Eydnudóttir brotnaði týsdagin, og tí skeyt hon við umvældum boga, og tað órógvaði kanska eitt sindur, tí nýggja hillin passaði ikki heilt til.

Eisini viðgekk Anja Eydnudóttir, at møðin kanska byrjaði at gera um seg eftir fleiri langar dagar úti á snotiligu fløtuni við Picky-leikvallirnar í Kirkwall.

 - Tað kann man væl siga. Vit skjóta so ótrúliga langar dagar. Vit eru móð kroppliga og í heysinum av hasi sólini. Vit eru uppsnerkt eisini, so tað spælir nógv inn, segði Anja Eydnudóttir, sum ikki hevur vant eins nógv til hesar leikirnar, sum hon hevur  gjørt fyrr.

Anja Eydnudóttir hevur vunnið trý gull og eina silvur áðrenn liðkappingina hósdagin.