Jónas: Hetta er sum ein gull fyri okkum

Frælsur ítróttur setti punktum við tveimum heiðursmerkjum í 400 metra stafettunum. Hjá monnunum vunnu Tummas Petur Sjóvará, Andreas Bjarnastein Antoft, Dánjal Dahl Ljósheim og Jónas Gunnleivsson Isaksen silvur við tíðini 3:22.83. Jersey vann við tíðini 3:17.35

 - Fyri okkum er hetta sum eitt gullheiðursmerki. Jersey hevur bara ein rennara, sum rann innleiðandi og teir kundu spara. Tað kunnu vit ikki, men eg skuldi bara hava hatta 2. plássið, sigur Jónas G. Isaksen.

Hjá kvinnunum hevur eisini verið fráfall í manningini og tí bleiv heitt á Elisabet Holm Simonsen, um at traðka til. Tað gjørdi hon so mikið væl, at føroysku kvinnurnar vunnu bronsu í 4x400 metur hjá kvinnunum.

 - Hetta hevur stóran týdning fyri okkum og vónandi kann hetta gera, at fleiri gentur velja at koma at renna, sigur Oddvør Josephsen.

Hinar á liðnum vóru Maria Biskopstø, ið rann avbera væl, og Margit Weihe Fríðmundsdóttir, sum setti punktum. Hon helt eftir renningina, at Abi Galpin hjá Guernsey hevði hug at forða seinastu metarnar.

 - Mær vitandi er tað snýt. Hon rann altíð fyri, so eg ikki slapp at yvirhála hana. Eg veit ikki um hevði klárað at verið fyrr á mál, men tað hevði broytt fortreytirnar um eg slapp framum á langsíðuni, sigur Margit Weihe Fríðmundsdóttir.

Frælsur ítróttur vann fýra gull, trý silvur og fimm bronsuheiðursmerki.