Nýggj kapping: Skulu rógva fimm kilometrar

Fimm túsund metrar við úthaldni, styrki og taktikki. Soleiðis skrivar Róðrasamband Føroya um nýggju langteinakappingina, sum verður á Skálafjørðinum.

Ístaðin fyri teir vanligu 1000 metarnar skulu føroysku róðrarfólkini royna seg teir fimm kilometrarnar frá Skálafirði og út á Skála.

 - Ein øðrvísi teinum í mun til tann klassiska FM-teinin upp á 100 metrar. Tað krevur eitt heilt annað slag av teknikki og taktikki at klára tann teinin, so tað verður øgiliga spennandi at síggja, hvussu leikur fer, sigur Petur Hansen, formaður í Róðrarsambandinum.

Kappast verður í fýra bólkum. Gentur og dreingir undir 18 ár rógva í 5-mannaførum, meðan kvinnur og menn yvir 18 rógva í 6-mannaførum. Talan verður um einkultstart, har tríggir minuttir vera ímillum hvønn bát, sum verður sendur út eftir fjørðinum.

Hendan kappingin legst afturat FM-kappróðrinum, inniróðrinum um veturin og Ódnartøkum um várið. 

 - Vit hava merkt millum fólk, at tey hava saknað okkurt fyri at gera kappingarárið eitt sindur longri, sigur Petur Hansen.

 - Hetta er ein kapping fyri tey, sum tíma at rógva víðari eftir ólavsøku og eru í Føroyum. 

Eisini er kappingin fyri tey lutfalsliga nógvu, sum rógva og venja nakað um summarið, men sum ikki halda seg til at kappast um føroyameistaraheitið.

Freistin at tekna til kappingina er mikudagin.