Bíða í mánaðir eftir arbeiðsloyvum: Landsstýrismaðurin lovar loysnir

Føroyskar fyritøkur hava seinastu mánaðirnar gjørt vart við, at bíðitíðin eftir arbeiðs- og uppihaldsloyvi er vorðin alt ov long. Síðani føroyskir myndugleikar í heyst yvirtóku umsitingina av loyvunum úr Danmark, eru málsviðgerðir farnar at taka fleiri mánaðir. 

Hetta skapar stórar avbjóðingar, bæði fyri fyritøkurnar, sum hava tørv á arbeiðsmegi, og fyri starvsfólkini, sum í mánaðir ganga í óvissu um síni rættindi. Útlendingastovan, sum viðger umsóknirnar, hevur í dag ov lítla arbeiðsorku, og er ein av høvuðsorsøkunum til trupulleikan.

Bæði hotell- og byggivinna hava sett orð á, hvussu støðan rakar teirra virksemi. Fyritøkur hava upplivað, at loyvini ikki verða endurnýggjað tá tey skulu, og at starvsfólk ikki tora at fara úr landinum, tí tey ikki hava fingið endaliga váttan. Tað hevur bæði rakstrarligar og fíggjarligar fylgjur.

Vinnan heldur, at støðan er ótolandi, og hevur víst á, at tað kundi verið skilagott at flutt málsøkið aftur til Danmarkar, har svartíðirnar vóru styttri og samskiftið greiðari.

Landsstýrismaðurin í lógarmálum, Bjarni Kárason Petersen, ásannar trupulleikan og sigur, at loysnir eru á veg.