Ítróttastjórin skumpar Jóannes úr Fredrikstad

Eftir trý ár í norska Fredrikstad FK skal 29 ára gamli Jóannes Bjartalíð finna sær eitt nýtt felag. Hóast hann er væl lýddur millum bæði áskoðarar og spælarar, umframt at venjarin hevur stórt álit á honum, so er ein maður, ið ikki vil hava Jóannes Bjartalíð í Fredrikstad. Tað er 27 ára gamli ítróttastjórin, norski Anders Jensen.

- Tað er ein ítróttastjóri, sum ikki vil hava meg við víðari – hann er kanska tann einasti har, sum ikki vil hava meg at halda fram. Tíverri, so er tað hann, sum bestemmar í felagnum, sigur Jóannes Bjartalíð.

Klaksvíkingurin hevur verið nakað skaddur seinastu tvey árini. Hann rennur ikki undan, at hetta hevur spælt inn. Nú verður arbeitt við at finna eitt nýtt felag.

- Tað vísir seg at vera nógvur áhugi. Bæði í Evropa og uttanfyri. Okkurt rørir seg í Asia. Fleiri feløg hava sett seg í samband við meg, og okkurt tilboð er komið, men ikki so nógv. Nú fáa vit at síggja, hvat tað endar við, men tað verður spennandi, sigur Jóannes Bjartalíð.

"Krútetandi, hamrandi sterkt" landslið

Hann hevur eisini havt trupult við at vinna sær pláss á landsliðnum hesa tíðina. Lámi klaksvíkingurin viðgongur eisini, at hann hevur ikki verið tann besta útgávan av sær sjálvum seinastu landsliðssamlingarnar, nú úrslitini hava verið góð, og fleiri bjóða seg fram.

- Landsliðið er krútetandi, hamrandi sterkt. Tá eg havi verið nógv skaddur seinastu tíðina, so havi eg ikki verið tann besta útgávan av mær sjálvum. Eg veit ikki, hvønn leiklut eg havi á hesum túrinum, men tað er ringt at koma á liðið, tá teir vinna tveir dystir og skjóta seks mál, sigur Jóannes Bjartalíð við einum brosi.

Hóast møguleikin er lítil, so er hann sannførdur um, at Føroyar skulu spæla fyri at koma til HM-endaspælið. Føroyar spæla móti Kroatia fríggjakvøldið klokkan 19.45. Kringvarpið byrjar at senda eftir Dag og viku.