Fosturbarn: "Eg hevði ikki klárað meg so væl í dag uttan fosturforeldrini"

Í fýra ár hevur 22 ára gamal Sara Johansen Christiansen verið knýtt at einari fosturfamilju. Og hon er ikki í iva. 

"Alt er fullkomiliga broytt til tað betra, síðani eg kom til fosturforeldrini. Eg havi lært nokk so nógv ting av teimum, ið hava lært meg at klára meg sjálva og sjálv hava børn."

Upplivað harðskap

Sara, ið hevur føroyskan pápa og tunesiska mammu, vaks upp í Tunesia, men flutti sum 16 ára gomul til Føroya. 

Lívið hevur ikki verið ein dansur á rósum fyri Saru. 

"Eg havi upplivað nokk so nógv," staðfestir hon. "Eg havi upplivað sálarligan harðskap, eg havi upplivað harðskap, so tað er nokk so nógv, og tað er nakað, sum liggur í mær."

Sara Johansen Christiansen

Funnið sína lívsleið

Sara kann í dag siga, at hon hevur fingið so mikið nógva hjálp frá fosturforeldrunum, sosialráðgevanum og sálarfrøðinginum, at hon hevur fótað sær í lívinum. 

Síðan fyrsta dagin hevur fosturfamiljan eggjað Saru at finna sína leið í lívinum, og í dag lærir Sara til frisør. 

"Eg elski tað. Eg havi altíð elskað at gjørt hár, lagt sminku og arbeitt við mínum hendrum."

Sara Johansen Christiansen

Ikki flov av sær sjálvari

Tað er ikki lætt fyri eitt barn ella ungt fólk at enda í einari støðu, har tørvur er á fosturforeldrum. 

"Men eg haldi ikki, at mann skal vera flovur av sær sjálvum, sínum lívi og upplivingum, sum onnur í familjuni hava verið atvoldin til. Tað er ikki tín skyld," staðfestir Sara.

Sara Johansen Christiansen dugir ikki at ímynda sær eitt lív uttan fosturforeldrini, ið vóru avgerandi fyri, at hon hevur megnað at fóta sær í lívinum

"Eg hevði ikki verið komin hertil, ið eg eri, uttan tey."