Á Neystabø: Trý ættarlið á hondbóltsferð í Trier

Í føroyska hópinum er blaðungi málverjin, Gylta Djurhuus á Neystabø. Á áskoðaraplássunum vera ikki færri enn trý ættarlið av Neystabø-familjuni.

Stella, Hansina, Poula, Dánjal, Helena og Kristian eru øll farin til Trier at stuðla hondbóltskvinnunum í HM-endaspælinum.

 - Øll okkara familjuferðing hevur verið orsakað av hondbóltinum í ár, og tað er eisini ein fínur máti at ferðast upp á, staðfestir Dánjal á Neystabø.

At ein av trimum málverjum nú eitur á Neystabø til eftirnavn, ger tað ikki minni spennandi at fylgja við.

 - Tað er stuttligt, at Gylta er við. Tá hon varð úttikin, blivu vit beinanvegin ordiliga spent, og so valdu vit øll at fara við, sigur Poula Djurhuus á Neystabø.

Tey eru meir ella minni samd um , at Føroyar fara at fáa minst tvey stig í bólkaspælinum, og tá hugsa tey helst um síðsta dystin í bólkinum ímóti Paraguai, men tey vóna, at tey fáa uppaftur meir.

Í morgin er Montenegro móstøðulið. Kringvarpið vísir dystin og byrjar at senda klokkan 18.50.