Vann FM og vetrarkapping - rakk ikki metunum

Julian Gregersen var langt fremstur, tá runnið var um føroyameistaraheitið í 10 kilometrum á vegi um vikuskiftið. 

Treystimaðurin var meir enn tríggjar minuttir frammanfyri Oliver Granhøj og Torbjørn Hentze, sum fingu ávíkavist silvur og bronsu hjá monnum.

Úrslitið gav eisini klaksvíkinginum sigurin í vetrarkappingini fyri fyrstu ferð. Hann vann allar fimm kappingarnar, sum hann var við í. 

Rakk ikki metunum

Julian Gregersen hevur verið besti føroyski langteinarennarin síðstu tvey árini og var stórfavorittur í Runavík - tí hevði hann eisini sett sær onnur mál.

Hann fór eftir rutumetinum hjá Jacob Ejby Stengaard frá í fjør upp á 31.36 minuttir og føroyska metinum hjá Albert Marna Joensen upp á 30.58 minuttir.

Tað eydnaðist kortini ikki at taka metini á hesum sinni. Hann kom á mál við tíðini 31.44 minuttir, og gjørdist akkurát ov stuttur.

Julian Gregersen var kortini væl nøgdur við at vera somikið nær við og ætlar sær at gera aðrar royndir at taka metið í 10 kilometrum og 15 kilometrum í ár.