Venjarin: Spældu við ró og greiðu

Liðavrikið var lykilin til flotta sigurin hjá Føroyum á Íslandi, segði venjarin Claus Mogensen eftir dystin við Tjarnir.

 - Vit spæla við ró og greiðu, sum ger, at Ísland hevur ilt við at fylgja við, og tað var eg sera fegin av at síggja, segði danin, sum eftir øllum at døma skal standa á odda fyri føroysku kvinnunum í einum endaspæli fyri triðju ferð.

Claus Mogensen rósti eisini Pernille Brandenborg og Anniku Fríðheim Petersen, sum við sínum avrikinum vóru størstu einstøku orsøkirnar til at føroyski sigurin gjørdist so greiður.

Liðskiparin á strikuni skoraði heili 12 ferðir upp á 12 skot, meðan innskifta Annika Fríðheim Petersen vendi dystinum, tá hon kom inn eftir lítið korter.

 - Vit vóru ikki nøgd við okkara avrik ímóti Portugal, og vit hava tosa um og vant tað, sum vit skuldu bøta um. Fokus og disiplin var partur av hesum, og tað gav eina ró. Vit spæla við eini ótrúligari ró, hóast vit koma afturum eina løtu í fyrra hálvleiki, segði venjarin.

Føroyar eru nú komnar upp á seks stig, og alt bendir á, at EM-plássið er tryggjað. Heilt víst er tað kortini ikki enn, men tað verður tað, um Portugal tapir fyri Montenegro í annaðkvøld. Hvussu víkir og vendir, skal mestsum alt ganga ímóti, um Føroyar skulu missa plássið.