Pauli setti allar upp á pláss í Eysturoynni - avgerðin fellur í dag

Pauli Poulsen vann sannførandi, tá næstseinasti teinurin í Leif Mohr Kring Føroyar varð súkklaður í Eysturoynni í gjár.

Skálamaðurin fór undan Bergtóri Thorsteinsson og Kostas Garoflos, og kom á mál á Kambsdali umleið tríggjar minuttir fremstur, og nú er leiðslan so mikið stór, at Kring Føroyar-sigurin nærum er vísur.

Súkklað varð úr Kambsdali til Runavíkar, runt um Agnið til Toftir til Lamba og Glyvradal. Síðan aftur um Gøtueiði til Leirvíkar, áðrenn leiðin gekk aftur til Kambsdalar umvegis gamla leirvíksvegin.

Teir tríggir fóru skjótt frá, og Pauli Poulsen fór undan á veg niðan á Hústoft omanfyri Lamba. Hann er nú smáar fimm minuttir frammanfyri Bergtór Thorsteinsson, sum er hálvan fjórða minutt frammanfyri Kostas Garoflos.

Tí er sera sannlíkt, at tað verður endaliga støðan millum tríggjar teir fremstu, men Pauli Poulsen hevur fyrr roynt at punktera í kapping, so hann kennir seg neyvan heilt vísan fyrr enn hann fer um mállinjuna eftir seinasta teinin í dag.

Súkklingin í dag byrjar klokkan 14.00 við Leif Mohr á Hoyvíksvegnum í Havn, har málið eisini er.