Pengar fara at vanta í, um einki verður gjørt

Nógv fólk vóru í Smæruni í dag, tá Búskaparráðið legði temafrágreiðing fram, sum hesuferð snýr seg um fíggjarpolitiskt haldføri.

Fìggjarpolitiskt haldføri snýr seg um, hvørt framtíðar almennu inntøkurnar fara at røkka til framtíða almennu útreiðslurnar, sigur Johnny í Grótinum, formaður í Búskaparráðnum. 

- Haldførisávísin er minus 4 prosent av BTÚ. Tað vil siga, at í miðal, so vanta 1,5 milliardir krónur hvørt ár tey næstu nógvu áratíggjuni. So boðskapurin er í veruleikanum, at har má okkurt gerast.

Búskaparráðið hevur saman við Landsbankanum ment ein frymil, sum kann brúkast til at gera nøkur roknað dømi. Við útgangsstøði í frymlinum hevur Búskaparráðið nøkur tilmæli til politikarar. Tey eru

• at hækka pensjónsaldurin,
• at samtykkja eitt fíggjarpolitiskt regluverk,
• at mótrokning og útsett pensjón skulu hanga saman,
• at fremja rakstrarsparandi íløgur,
• at gera átøk, ið fáa tey ungu at velja Føroyar til,
• og at lækka útreiðslurnar við eitt nú nýskipanum

Johnny í Grótinum greiðir víðari frá, at ein annar møguleiki er.

- Um vit einki justera upp á hasi tingini, sum eg nevndi, so verður avleiðingin at skatturin má hækka. Tí vit sleppa ikki at taka so nógv lán. Tað er síðsti møguleiki. Skattatrýstið í Føroyum er longu høgt, so møguleikin at skrúva upp á tað er ikki stórur.

Sí innslag úr Degi og viku við gesti