Í Kultura hesa ferð fara vit ein túr í "Savnsgull", á framsýningina "Eftirmyndir" og vit tosa um "Bókadagar", sum verða í Norðurlandahúsinum.

Ivan Hentze Niclasen er júst settur sum verkætlanarleiðari fyri annan part av verkætlanini "Savnsgull". Høvuðsuppgávan er at gera kringvarpssavnið atkomuligt hjá almenninginum. Talan er um eitt stórt arbeiði við fleiri tættum - eitt nú nýggjar skipanir til sjónvarps- og útvarpsframleiðslu í Kringvarpinum, sum skulu knýtast í kringvarpssavnið. Vit tosa við Ivan um arbeiðið at gera savnið atkomuligt, og fregnast um, nær vit øll kunnu leita í savninum. 

Í løtuni er serframsýningin "Eftirmyndir" at síggja í Listasavni Føroya. Talan er um verk eftir listamanninum Jens Dam Ziska. Framsýningin er fyrsta stóra savnsframsýning hansara, og flestu málningarnir eru málaðir í Los Angeles í USA, har hann nam sær listaútbúgving (MFA) á University California. Vit tosa við Jens Dam Ziska um framsýningina, listarligan íblástur og hvat málningalistin kann geva okkum í eini samtið, har alt gongur við rúkandi ferð.

Og so taka vit eisini pulsin á bókadøgum, sum verða 14.-16. november. Á skránni er ein rúgva av tiltøkum, verkstovum og nýggjum bókum. Gunn Hernes, stjóri í Norðurlandahúsinum kemur í gátt.