Positivur fundur um Hoyvíkssáttmálan

Íslendski uttanríkisráðharrin, Guðlaugur Þór Þórðarson, er bjartskygdur um framtíðina hjá Hoyvíkssáttmálanum eftir fundin við Jenis av Rana, landsstýrismenn, í Keypmannahavn í gjár.  

Ráðharrin vil, sambært heimasíðuni hjá Uttanríkisráðnum, at sáttmálin heldur fram. Føroyar hava annars sagt sáttmálan upp, so hann fer úr gildi á nýggjárinum.

 >> SÍ EISINI Lagnan hjá Hoyvíkssáttmálanum avgjørd í dag

Jenis av Rana skal kunna landsstýrið og løgtingið fyrst um úrslitið av fundinum í gjár, áðrenn hann almannakunnger úrslitið.

Hann kunnar landsstýrið nú fyrrapartin. Og klokkan 14:15 er ráðførsla í Uttanlandsnevndini hjá løgtinginum.

Skal uppsøgnin takast aftur, noyðist Jenis av Rana í løgtingið við lógaruppskoti, sum ógildar uppsøgnina, sum løgtingið samtykti fyri ári síðani.