Flogfar skotið niður: Fleiri fólk tikin

Iran hevur handtikið fleiri fólk í sambandi við, at eitt flogfar varð skotið niður uttan fyri Teheran í síðstu viku.

Tað upplýsir Gholamhossein Esmaili, talsmaður fyri iransku rættarskipanina, sambært danska kringvarpinum.

Einki verður sagt um, hvør er tikin, ella hvønn leiklut, tey hava havt í sambandi við  flogvanlukkuna.

Fleiri gerningsmenn

Iranski forsetin, Hassan Rouhani, sigur í dag, at fleiri gerningsmenn eru, tí tað ber ikki til, at bara ein persónur kann hava ábyrgdina av hendingini.

Hassan Rouhani vil hava, at ein serligur dómstólur við serfrøðingum kannar umstøðurnar í sambandi við, at flogfarið varð skotið niður.

Vanlukkan kravdi 176 mannalív.