Lívrenta og náttúrulóg í tinginum í dag

Løgtingið fer í dag at viðgera uppskotið hjá Framsókn um, at kvinnur og menn eiga at fáa tað sama í lívrentu.

Framsókn sigur, at nú fáa kvinnur 13 prosent minni enn menn um mánaðin.

Orsøkin til, at kvinnur fáa minni um mánaðin enn menn, er tann, at kvinnur liva í miðal longri enn menn.

Framsókn vil hava løgtingið at heita á landsstýrið um gera uppskot um, at lívrentutryggingar, sum verða teknaðar frá 1.januar 2021, hava somu treytir fyri kvinnur og menn.

Náttúrumargfeldi

Tingið skal eisini viðgera trý uppskot, sum hava samband við lógaruppskotið um náttúrumargfeldislógina.

Javnaðarflokkurin og Tjóðveldi mæla til, at friðingarnevndirnar verða tiknar av, og heimildirnar hjá teimum verða fluttar til landsstýrisfólkið, sum so væntandi leggur sínar heimildir til Umhvørvisstovuna at umsita.

Uppskot er eisini um, at kærunevndin í lendismálum eisini umfatar náttúru og umhvørvi og broytir navn til kærunevndin í náttúru-, umhvørvis- og lendismálum.

Nevndarfundir

Fíggjarnevndin og Trivnaðarnevndin hava fund fyrrapartin.

Fíggjarnevndin viðger framvegis landsroknskapin fyri 2018, útbyggingina á Landssjúkrahúsinum og lættarnar hjá heimavirki. 

Vinnuhúsið, landsstýrismaðurin í fíggjarmálum og Taks og HMP Consult eru biðin um at koma á fundin í dag. 
 
Trivnaðarnevndin hevur níggju mál á sínari dagsskrá í dag, millum annað vælferðarlógina.

Løgtingsfundurin í dag er klokkan 11.00.