Corona: Danska stjórnin hjálpir vinnulívinum

Danska stjórnin kunngjørdi fyri løtu síðani átøk, sum skulu hjálpa fyritøkum og vinnulívinum, meðan corona-smittan herjar.

Trý átøk vórðu kunngjørd í dag. Fíggjarmálaráðharrin, Nicolai Wammen, segði, at hetta er bara byrjanin, og væntandi koma fleiri átøk seinni.

Eitt av átøkunum er, at fyritøkur fáa longda freist at gjalda meirvirðisgjald og inntøkuskatt. Tað gevur fyritøkum umleið 125 milliardir krónur meiri í gjaldføri, og verjir sostatt bæði fyritøkur og arbeiðspláss, sigur Nicolai Wammen.

Tey, sum hava skipað fyri tiltøkum, sum annaðhvørt eru avlýst ella útsett, fáa endurgjald úr ríkiskassanum.

Skundlógir verða gjørdar, sum skulu bøta gjaldførið hjá fyritøkum, við at útseta gjaldsfreistirnar fyri meirvirðisgjald og partafelagsskatt.

Haraftrat er ætlanin, at stjórnin og vinnulívið í felag skulu gera uppskoti um hjálpartiltøk, í sambandi við avbjóðingarnar av coronasmittuni.