– Ov tíðliga at lata skúlar og dagstovnar upp

– Tað er ov tíðliga, at lata dagstovnar og skúlar upp longu nú. Føroyar skuldu heldur bíða við at tikið slíkar avgerðir, til vit síggja, hvat stóru evropeisku londini gera.

Tað sigur Shahin Gaïni, serlækni í infektiónssjúkum, nú skúlar og dagstovnar gera klárt til at taka ímóti børnum aftur mánadagin.

Shahin Gaïni sigur í samrøðu við danska blaðið, Politiken, at hann saknar eina neyva grundgevinging fyri, hví skúlar og dagstovnar skulu lata upp nú.

Skuldu bíða so leingi, sum tilber

Shahin Gaïni skilur kortini grundgevingina um, at foreldur skulu aftur til arbeiðis, og tí mugu fáa børnini ansað á stovni ella aftur í skúla.

Í Føroyum er eingin tilburður av COVID-19-sjúkuni staðfestur síðani 6. apríl. Enn er kortini ov tíðliga at siga, at smittuvandin er av.

– Í staðin fyri at skunda okkum, at taka avgerðir, skuldu vit heldur bíðað við at lata skúlar og dagstovnar upp, so leingi, sum tilber, heldur Shahin Gaïni.

Hoyr eina longri samrøðu við Shahin Gaïni her.