KÍ hartar dómaraavrikið í Fuglafirði

KÍ finst hvassliga at dómaraavrikinum hjá Peturi Reinert í dystinum millum ÍF og KÍ, sum var spældur leygardagin.

Tað ger felagið í grein, sum var at lesa á almennu heimasíðu felagsins, ki.fo, í gjárkvøldið, men seinni var strikað aftur av síðuni. 

 - Tey, sum vóru til dyst í Fuglafirði leygardagin, vóru vitni til nakrar sera farligar støður, har ÍF-leikarar ferð eftir ferð takklaðu bæði í luftini og aftanífrá, har tað bert gav gult kort, skrivar felagið.

Bæði Karl Løkin og Ari Ólavsson Ellingsgaard fingu gul kort fyri takklingar, sum viðmerkjarar, bæði í Føroyum og í Noreg, hava sett spurnartekin við. 
 

 - Hettar eru farligar støður, sum kundu gjørt stóran skaða á okkara leikarar. Tað var sera heppið, at eingin av okkara leikarum komu skaddir frá hesum dystinum, og kundi tað væl hent seg, at eitt nú Bjartalíð gjørdist skaddur í 4 vikur ella meir í hesum dystinum, skrivar ki.fo.

 - Vit meta ikki, at dómarin ger sítt arbeiði at verja leikararnar í dystinum móti slíkum farligum takklingum, sum ikki kunnu metast sum partur av siðiligum fótbóltsspæli. Leikararnir hjá ÍF spæla soleiðis, sum dómarin loyvir teimum, og tískil er tað dómarin, sum av røttum skal verja leikarar á báðum liðunum ímóti at slíkt kemur fyri, skrivaði heimasíðan í gjárkvøldið. 

KÍ heitir í somu grein á Fótbóltssamband Føroya og dómaranevndina at hyggja nærri at dømingini í dystinum millum ÍF og KÍ.


 

 

Formaðurin í KÍ, Tummas Lervig, sigur í stuttari viðmerking, at greinin og innihaldið í henni ikki var viðgjørd av øllum pørtum, og at hon var ov hvassorðað, og tí varð hon tikin av aftur heimasíðuni.

Hann sigur, at KÍ hevur álit á, at dømingin leygardagin og sum heild verður viðgjørd og eftirmett av viðkomandi myndugleikum á rættan hátt. 

Hann leggur afturat, at pláss skal vera fyri konstruktivum kritikki, og at atfinningarnar á ongan hátt vóru vendar ímóti ÍF og spælarum teirra.

*Greinin er dagførd viðmerkingunum frá Tummasi Lervig