Yvir 1000 arbeiðsgevarar biðið Als um pengar

4.698 løntakarar høvdu verið ella vóru í lønarískoytisskipanini hjá Als, tá gjørt var upp 13.mai.

1003 arbeiðsgevarar høvdu brúkt skipanina.

Men talið er minkað nógv, tí fólk eru farin aftur til arbeiðis, ella tey hava mist arbeiðið.

Í dag eru 2.123 fólk í skipanini, sum varar hendan mánaðin afturat.

Tey, sum hava verið ella eru í lønarískoytisskipanini, eru úr 40 vinnugreinum sambært vinnuskránni hjá Taks.

Og so eru 330 arbeiðsgevarar, sum ikki hava eina vinnugrein í vinnuskánni. Hesir arbeiðsgevarar hava sent 793 fólk í lønarískoytisskipanina. 

Handlar ovast

Tann einstaka vinnugreinin, sum hevur sent flest fólk í lønarískoytisskipanina, eitur smásøla, undantikið bilar og umvælingarverkstaðir. Her eru 512 løntakarar.

Síðani koma gistihús og matstovur. Her høvdu verið ella vóru 481 fólk í skipanina 13.mai.

Tølini eru í einum svari, sum Helgi Abrahamsen, landsstýrismaður, hevur givð Hervør Pálsdóttur, løgtingskvinnu, sum spurdi um ungdómsarbeiðsloysi, nú korona hevur lagt serliga tænastuvinnuna lamna.

Ungdómsarbeiðsloysi

663 teirra, sum vóru í lønarískoytisskipanini hjá Als tann 12.mai, vóru í aldrinum 16 til 25 ár.

Tað er aldursbólkurin, sum verður brúktur, tá tosað verður um ungdómsarbeiðsloysi. 

Tann 12.mai vóru 2.763 fólk í lønarískoytisskipanini, so 24 prosent teirra eru ungdómar.

Helgi Abrahamsen sigur, at veruliga ungdómsarbeiðsloysið kenna vit ikki, fyrr enn skipanin við lønarískoyti fer úr gildi 30.juni.