Sølan minni enn helvtina

– Vit selja í løtuni bara 40-50 prosent av ti, sum er vanligt hjá okkum hesa árstíðina, men vit hava kortini góðar vónir til hesar næstu mánaðirnar.

Tað sigur Jóhanna á Bergi, stjóri í Atlantic Airways.

Felagið hevur síðstu tríggjar mánaðirnar sagt nógvum fólkum úr starvi, og hóast sølan bara er ein part av tí, hon vanliga er hesa tíðina, er stjórin hjá Atlantic Airways bjartskygdur.

– Umsetningurin hjá okkum er nógv ávirkaður, og alt er óvist í løtuni, men vit hava lagað okkum til hesa broyttu støðuna, sigur Jóhanna á Bergi.

Óvist um fleiri uppsagnir koma

Enn ber ikki til at siga, um føroyska flogfelagið noyðist at siga enn fleiri fólkum úr starvi, nú virksemið bara er ein part av tí, felagið annars hevði roknað við.

– Tað er trupult at meta um í løtuni. Eg haldi, vit hava gjørt tær sparingarnar, ið skulu til, sigur Jóhanna á Bergi.

Tað er ikki bara á teimum vanligu rutunum, at sølan hjá Atlantic Airways er minkað nógv síðstu tíðina. Tað er eisini langt millum leigutúrarnar í hesum døgum.

– Vit flúgva so at siga ongar leigutúrar í løtuni. Bara onkran hendingatúr nú og tá, sigur Jóhanna á Bergi, stjóri í Atlantic Airways, við útvarpið.