OL verður í Tokyo næsta ár

OL verður í Tokyo næsta ár, sama hvussu smittutrýstið er í heiminum.

Tað sigur John Coates, ið er varaforseti í altjóða olympiska felagsskapinum, IOC, við AFP.

Olympisku leikirnir byrja 23. juli næsta ár.

Útsettir

Í mars í ár vóru olympisku leikirnir útsettir til næsta ár. Fleiri íðkarar og ítróttasambond vildu hava leikirnar útsettar. Orsøkin var koronusmittan.

Ein kanning vísir annars, at bara fjórði hvør í Japan heldur tað vera ráðiligt at halda leikirnar næsta ár, skrivar BBC. Tey vilja heldur útseta ella avlýsa tiltakið.

Japan hevur framvegis ikki latið upp fyri umheiminum fyri at berja koronusmittuna niður.

Sverri umboðar Danmark

IOC hevur sett ein arbeiðsbólk at fyrireika leikirnar, og hvussu farast skal fram, tá ræður um smittutrýst.

Ein føroyingur verður við til OL næsta ár. Sverri Sandberg Nielsen fer at umboða Danmark í einmansrógving.