- Tíðindi, mentan og ítróttur
Reumert-heiðursløn fyri fjórðu ferð
![](https://kvf.fo/sites/default/files/styles/grein-ovasta-mynd/public/olaf_johannesen_1.jpg?itok=5dp6tNwv)
Føroyski sjónleikarin, Olaf Johannessen, vann í gjárkvøldið ársins Reumert-virðisløn fyri besta mannliga leiklut.
Reumert-virðislønirnar heiðra danska palllist.
Tað sjáldsama við heiðrinum hjá Olafi Johannessen í ár er, at hann vann virðislønina saman við einum øðrum sjónleikara, Jens Albinus. Teir hava leiklutir sum tvíburar í eini skaldsøgu eftir Agotu Kritof.
Tað er ikki hent fyrr, at tveir persónar vinna sama heiður, men dómsnevndin kallaði teirra framførslu í sjónleikinum "Det store stilhæfte" fyri skelkandi góðan sjónleik og eina framúr tvíframførslu.
Í sjónleikinum "Det store stilhæfte" eru Olaf Johannessen og Jens Albinus einsamallir á pallinum.
Hetta er fjórða ferðin, at Olaf Johannessen vinnur eina Reumert-virðisløn fyri sína palllist.
Hann vann eisini heiðurin fyri besta mannliga leiklut í 2015 og 2016.
Í 2018 fekk Olaf Johannessen Heiðursreumertin.