Løgtingið samtykt koronugjaldið

Løgtingið hevur samtykt uppskotið hjá Jørgeni Niclasen, landsstýrismanni í fíggjarmálum, um at ferðafólk sjálvi skulu rinda fyri at verða kannað fyri koronu, tá tey koma til Føroya.

Løgtingið samtykti frammanundan at víkja frá tíðarfreistini, tí lógin skal koma í gildi 1. oktober, sum er hósdagin.

Ein samd fíggjarnevnd tók undir við uppskotinum, men hevði eisini eitt broytingaruppskot, sum nágreinar ávíst viðurskifti í lógini, og tað varð samtykt.

Uppskotið varð einmælt samtykt við aðru viðgerð. Øll 26 tingfólkini, sum vóru í tingsalinum, atkvøddu fyri. 

Við triðju viðgerð, sum var fyri løtu síðani, varð uppskotið endaliga samtykt við 26 atkvøðum fyri og ongari ímóti.

Gjaldið fyri at verða kannaður fyri koronu verður 312 krónur.

Lógin um tíðaravmarkað avgjald á ferðandi, sum koma til Føroya, fer sambært uppskotinum úr gildi á nýggjárinum.