Varðhaldsfongslaður fyri barnapornografiskt tilfar

Ein maður fyrst í 30-unum er varðhaldsfongslaður í fýra vikur fyri at hava barnapornografiskt tilfar í varðveitslu.

Tað var fyri tveimum vikum síðani, at løgreglan kannaði ferðafólk, sum komu til landið við Norrønu. 

Løgreglan fann rúsevni uppi á manninum, og hann varð tí handtikin.

Telefon og telda hjá manninum vórðu kannað, og har vóru stórar nøgdir av barnaporno,  grovum barnaporno.

Upp í seks ára fongsul

Maðurin skal sita í varðhaldi, men løgreglan kannar, um hann hevur sent øðrum barnapornografiskt tilfar. 

Revsingin fyri at senda slíkt tilfar víðari er upp í seks ára fongsul. 

Hevur hann ikki sent tilfarið víðari, er revsingin fyri at hava tað í varðveitslu eitt árs fongsul, sama hvussu nógv, og hvussu grovt tilfarið er.

Maðurin er eisini skuldsettur fyri í tveimum førum at hava tikið myndir av einum barni, meðan tað svav og tí ikki kundi verja seg, sigur Heri Andreasen, leiðari á kanningardeildini hjá løgregluni.