Atsókn í Nice kravt trý mannalív

Í minsta lagi trý fólk hava latið lív, og fleiri eru særd í kníválopi við Notre Dame-kirkjuna í franska býnum Nice. 

Ein kvinna, sum var stødd inni í eini kirkju, varð skorin á háls, og deknurin varð eisini dripin. Triðja ofrið var ein ung kvinna, siga keldur í løgregluni.

Hetta hendi um 9-tíðina í morgun lokala tíð.

Trygdarstigið hækkað

Franski forsætisráðharrin, Jean Castex, sigur, at trygdarstigið í Fraklandi er hækkað eftir hendingina, og innanríkisráðharrin Gerald Darmanin, hevur kallað til kreppufund. 

Tíðindafólk á staðnum siga, at bæði herurin og løgreglan eru í handilsgøtuni, og økið kring kirkjuna er avbyrgt.

Borgarstjórin í býnum, Christian Estrosi, sigur, at talan helst er um yvirgangsálop. 

- Gerningsmaðurin rópti Allahu Akbar, - "Allah er stórur", eisini eftir at løgreglan hevði handtikið hann, sigur Estrosi.

Keipumyndir av profetinum 

Álopið hendir samstundis, sum Frakland roynir at fóta sær, eftir at lærarin, Samuel Paty, fyri sløkum tveimum vikum síðani varð skorðin á háls. 

Orsøkin var, at hann hevði víst næmingunum keipumyndir av Mohammed profeti í einum tíma, sum snúði seg um skrivi- og talufrælsið.

Eftir drápið boðaði franski forsetin, Emmanuel Macron, frá herdum tiltøkum móti fleiri muslimskum felagsskapum.

Boðini fullu ikki í góða jørð í fleiri londum í Miðeystri, og turkiski forsetin, Erdogan, segði franska forsetan vera í ørviti.