Fingu ikki viðhald

Tá vanliga leiktíðin í fjórðingsfinaluni millum EB/Streym/Skála og NSÍ, kvinnur, var av, var støðan 1-1, og farið varð tí til longda leiktíð, sum dómarin ásetti til tvær ferðir 10 minuttir og í tráð við ásettu kappingarreglur hjá FSF. 

NSÍ skoraði sigursmálið í longdu leiktíðini og vann harvið dystin 2-1. Eftir dystin kærdi EBS/Skála longdina á longdu leiktíðini, tí siðvenja er at spæla tvær ferðir 15 minuttir longda leiktíð í vaksnamannadeildum. 

Niðurstøðan hjá Aganevndini er tó, at dómarin í dystinum hevur fylgt kappingarreglunum, og gongur tí ikki kæruni á møti. 

Finalan spælast 21. november

Aganevndin vísir samstundis á, at ósamsvarið í verandi kappingarreglum fyri steypakappingina hjá kvinnum verður lúkað burtur beinanvegin. 

Sostatt er NSÍ víðari í hálvfinaluna í steypakappingini, har tær skulu spæla ímóti B36. Í hinari hálvfinaluni hittast KÍ og ÍVB. 

Hálvfinalurnar verða spældar á uttanveltaðum vølli komandi leygardag, og steypafinalan verður á Tórsvølli leygardagin 21. november, skrivar FSF.