Nú skal støða takast til byggiloyvið hjá KOKS

Umsóknin hjá KOKS um byggiloyvi í Fossdali á Velbastað er í skránni fyri býráðsfundin í Havn í kvøld. Men áðrenn byggiloyvi kann latast, má serstaka byggisamtyktin fyri Fossdalsgjógv broytast.

Umsitingin og Byggi- og býarskipanarnevndin hjá býráðnum mæla til at broyta byggisamtyktina. Men treytin er, at avvarðandi myndugleikar geva loyvi.

 >> SÍ EISINI Kommunan eigur fyrsta leikin um Fossdal

Búnaðarstovan mælti fyrst frá at umskipa lendið undir Syðradalsvegnum norðan fyri Fossdalsgjógv til aðra nýtslu enn landbúnað. Umsókn er um byggiloyvi til ein køst í Fossdali, har sum KOKS hevur søkt um byggiloyvi.

9. september í ár gav Búnaðarstovuni tó tilsøgn um, at Búnaðarstovan er sinnað at avhenda økið til annað endamálið enn landbúnað, um so er, at byggisamtyktin verður broytt.

Búnaðarstovan vísir á, at tá umsókn um at keypa lendið kemur, verður hon send til hoyringar hjá festaranum á staðnum, sum eisini hevur møguleika at kæra eina avgerð hjá Búnaðarstovuni um sølu til landbúnaðarstevnu.