Mannasmuglarar handtiknir í Italia

Italienska løgreglan framdi í gjár atsókn móti einum kriminellum netverki, sum er undir illgruna fyri at hava smuglað migrantar til Evropa. 19 fólk vórðu handtikin í atsóknini. 

Netverkið er undir illgruna fyri at hava hjálpt migrantum frá millum annað Afganistan, Iran, Irak og Pakistan at koma til Evropa við seglbáti.

Málið kannað í tvey ár

Netverkið skal eisini hava skipað fyri, so at migrantarnir vórðu smuglaðir víðari um markið úr Italia til Frakland í bilum.

Millum tey handtiknu eru fólk úr Irak, Afganistan, Kurdistan og Italia. Tey hava millum annað falsað skjøl, sum hjálptu migrantunum at søkja um uppihaldsloyvi í Evropa.

Løgreglan hevur kannað málið síðani 2018, eftir at 10 bátar komu til Italia úr Turkalandi og Grikkalandi, og ikki úr Libya, sum vanligt var, skrivar NTB.