Taka ikki undir við uppskotinum um tilfeingisrentu

Teir tríggir andstøðuflokkarnir, Javnaðarflokkurin, Tjóðveldi og Framsókn, taka ikki undir við uppskotinum hjá landsstýrinum um tilfeingisrentu.

Flokkarnir hava nú svarað Jørgeni Niclasen, landsstýrismanni, og Fíggjarmálaráðnum upp á útrokningarnar, sum aðalráðið gjørdi.

Teir vísa á, at uppskotið hjá landsstýrinum byggir ikki á nakrar útrokningar um verulig tøl, hvat tilfeingisrentan er. 

"Politiskur handil"

- Landsstýrið hevur saman við umboðum fyri størstu reiðaríini ásett eitt tilvildarligt prosenttal á fýra fiskasløg/fiskiskap sum eina politiska semju ella "politiskan handil." Tilfeingisgjøldini eru tí mest sannlíkt langt undir veruliga tilfeingisrentuna, ikki minst tá prísirnir eru høgir. Tí kann andstøðan ikki taka undir við uppskotinum, siga  Javnaðarflokkurin, Tjóðveldi og Framsókn í svarinum til Fíggjarmálaráðið.

Sum minstamark, siga andstøðuflokkarnir, skal veruliga tilfeingisrentan, bygd á verulig tøl og útrokningar, í størstan mun verða tikin inn til landið.

Útlendskur ognarskapur skal takast úr føroyskari fiskiveiði og veiðirættindum.

Og privat keyp og søla av framíhjárættindum at fiska og harvið tilfeingisrentuni skal halda uppat.

Skrivið frá teimum trimum flokkunum kann lesast her

Meiri verður at frætta í tíðindunum klokkan 18.