Øll ferðafólkini á Norrönu koronukannast

Tá Norröna kemur á Seyðisfjørð klokkan ellivu fyrrapartin, fara fólk frá koronumyndugleikunum um borð at kanna tey bæði fólkini, sum hava koronusmittuna.

Íslendskir myndugleikar kunngjørdu í gjár, at tvey ferðafólk, sum komu umborð í Danmark, eru koronusmittað.

Høvdu negativa kanning at vísa á

Fólkini høvdu 72 tímar gamla negativa koronuroynd við sær. Men tá tey vórðu kannað fyri koronu á Norrönu var úrslitið positivt. Tey eru avbyrgd umborð.

Hildið verður ikki, at tey hava smittað onnur umborð. Tá Norröna kemur á Seyðisfjørð, verða øll ferðafólkini kannað. Tey skulu í sóttarhald í fimm dagar, og so kannast aftur.

Tey, sum eru smittað, verða framvegis avbyrgd, meðan kannað verður, um smittan kanska er gomul. Tey smittaðu hava ikki sjúkueyðkenni, verður sagt í fráboðanini. 77 ferðafólk eru við Norrönu hendan túrin.