Talv: Umdystur um FM-heitið

Høgni Egilstoft Nielsen úr Sandavágs Talvfelag og Martin Poulsen úr Havnar Telvingarfelag telva umdyst um FM-heitið í talvi klokkan 14 í dag.

Telvað verða fyrst tvey kviktalv - tá hava telvararnir á leið hálvan tíma í part til talvið. Endar umdysturin 1-1, verða tvey snartalv telvað. Tá hava telvararnir bara tríggjar minuttir í part. Stendur framvegis á jøvnum eftir snarkappingina verður dysturin avgjørdur í sonevndum Armageddon-talvi.

Í unglingabólkinum verður eisini umdystur um FM-heitið í dag. Rókur Davidsen úr Klaksvíkar Talvfelag og Brestir Samuelsen úr Havnar Telvingarfelag gjørdust javnir á fyrsta plássi, og telva tí umdyst hvør móti øðrum í dag.

Høgni Egilstoft Nielsen vann FM-heitið í fjør eftir umdyst móti Luitjen Akselsson Apol.

Fylgjast kann við beinleiðis leik fyri leik á heimasíðuni hjá Talvsambandinum, tá umdystirnir um FM-heitið verða seinnapartin.