Kuldin ávirkaði elframleiðsluna

Kuldin í januar og februar ávirkaði elframleiðsluna hjá SEV. Fyrsta ársfjórðingin kom grøna elframleiðslan hjá SEV upp á 49 prosent av samlaðu framleiðsluni.

Frostið í januar og inn í hálvan februar hevði frostbinding við sær, ið minkaði munandi um vatnorkuframleiðsluna, umframt at stilla veðrið tarnaði vindorkuframleiðsluni.

51 prosent frá olju

Seinna helvt í februar og stóran part av mars var lýggjari í veðrinum og nógv regn. Hetta hevði við sær, at ferð kom á vatnorkuframleiðsluna.

Burðardygga framleiðslan hjá SEV var í januar 38 prosent, í februar var hon 53 prosent og í mars 56 prosent.

Í fyrsta ársfjórðingi framleiddi SEV mest streym úr olju, 51 prosent. 32 prosent kom frá vatni, 15 prosent frá vindi, biogass sløk tvey prosent, og sól 0,02 prosent.