Letur ein sunnan háskúla frá sær

Sigur tú ítróttarháskúlin í Suðuroy, sigur tú eisini Guðmundur Joensen. 

Fyri fimm árum síðan fekk hann uppgávuna at byggja skúlan upp frá grundini, tá hann varð settur sum fyrsti leiðarin. 

Ætlanirnar og orðini vóru stór, og nú - fimm ár seinni - heldur Guðmundur Joensen, sum nú gevst, at hann letur ein sunnan skúla frá sær.

 - Eg haldi, at vit hava fingið góðar afturmeldingar frá næmingunum og teimum rundanum næmingarnar. Tað er sál í dagligdegnum, og tá tey eru liðug, fella nógv tár, og vit merkja á teimum, at tey fáa nógv burturúr, sigur Guðmundur Joensen, sum ikki hevur gjørt av, hvat hann nú skal takast við.

Síðstu fimm árini er skúlin er vaksin munandi í vævi, bæði so og so. Fyrsta árið vóru 17 næmingar, og nú er fullsett við 48 næmingum úr alskyns londum.

Nýtt næmingaheim er tikið í nýtslu, og fótbólts- svimji, venjingar og ikki minst adventure breytin hava fingið fastar karmar.

Skúlin hevur broytt gerandisdagin

Ein, sum hevur gingið á ítróttarháskúlanum, er havnamaðurin, Niels Áki Mørk. Hann hevur bert gott at bera fráfarandi leiðaranum og uppihaldinum í Vági.

 - Eg fór suður sum ein drongur, sum ikki tordi at siga so nógv, og tá eg kom heim aftur kundi eg tosa við ein og hvønn, sigur Niels Áki Mørk.

Hann fór eisini suður sum fótbóltsspælari, men skúlaskeiðið snaraði áhugan inn á nýggjar leiðir. 

 - Beinanvegin, tá eg kom norðuraftur, byrjaði eg upp á crossfit í Tvørmegi, og ígjøgnum tað fekk eg áhuga fyri olympiskari vektlyfting, har eg nú eri føroyameistari og venji tað nærum hvønn dag, sigur Niels Áki Mørk.

Eisini mannaðu næmingarnir Royndina Fríðu og gjørdu ikki mætari enn at vinna føroyameistaraheitið í 2019.