Føroyar varðveita sítt kredittvirði

Í juni 2021 hevði ratingfyritøkan Moody's netfundir við landsstýrið, andstøðuna og Landsbanka Føroya, og í gjár gjørdi ratingfyritøkan greitt, at Føroyar varðveita sítt kredittvirði.

Ratingin er Aa2 við støðugum útlitum.

Føroyar hava við hesum triðhægstu meting á ratingstiganum hjá Moody's, sum hevur 21 stig í alt. Somu meting sum Frakland.

Ratingin sigur nakað um, hvussu evnini hjá Føroyum eru at rinda skuld aftur. 

Landsbankin greiðir frá, at tað hevur týdning at fáa eitt gott próvtal, tí so eru tað fleiri íleggjarar, sum vilja veita Føroyum lán. Góða próvtalið hevur eisini ávirkan á, hvussu lága rentu landskassin skal rinda fyri lánið.

Samanumtikið er grundgevingin fyri ratingina:

- at Føroyar hava fíggjarligt sjálvræði,

- at Føroyar hava eitt høgt minstagjaldføri, ið minkar um endurfíggingarváðan. Minstagjaldførið er í 2021 3,3 milliardir krónur,

- at, hóast undirskot eru á fíggjarlógini í 2020 og 2021 orsakað av koronu, so vil skuldin í mun til rakstrarinntøkurnar hjá landskassanum venda aftur til at vera fallandi næstu árini,

Og, at sannlíkindini fyri at Danmark veitir hjálp um neyðugt, eru stór.